%
Апстинентите од Клубот на лекувани алкохоличари им посветуваат посебно внимание на новите апстиненти, на оние, кои ја започнуваат својата борба со алкохолната болест. Но, зошто е потребен толку голем труд за да се достигне победата? Зошто е потребна толкава концентрација и внимание во слушањето, на прв поглед на досадното и веќе стотиципати слушнатото раскажување на глупостите од алкохолниот пекол?
- Прво, нашата спремност тоа да го направиме, претставува најконкретен доказ за почитување на личноста на алкохоличарот. Со тоа што на алкохоличарот му посветуваме внимание и почит, кое би му го посветиле на докажан терапевт, алкохоличарот ќе почувствува поголема вредност во себе, ќе почувствува дека во него има или може да има нешто, што е достојно за почит. На апстинентите, во почетокот на нивното лекување, им е многу тешко, кога ќе се соочат со процесот на дефинирање на своите вистински вредности и донесување на сопствени одлуки. Често ги фаќа паника и страв, бидејќи треба многу повеќе да се потрудат, за правилно да ја насочат сопствената егзистенција. Во нивната свест живее лажна илузија дека, пред да почнат да апстинираат им било многу посигурно и полесно, кога наместо нив, одлуките ги донесувал нивниот господар – алкохолот.
- Второ, колку повеќе алкохоличарот ќе почувствува дека е вреден и ценет, толку повеќе ќе размислува за прифаќање на вредни работи од животот и многу повеќе ќе се труди да ги исполни нашите очекувања. Секој човек, за да може да работи во својата дејност, треба да ја смета за важна и добра. И затоа, каква и да е положбата на човекот, тој бездруго во себе ќе изгради таков поглед на човековиот живот воопшто, при кој неговото делување ќе му изгледа важно и добро. На пример, луѓето обично мислат дека крадецот, алкохоличарот, проститутката… не признавајќи дека нивните активности се срамни, гадни и погрешни, треба да се срамат од нив, но се случува сосема спротивното. Луѓето, што судбината или пак нивните грешки и гревови ги ставиле во извесна положба, колку и да е погрешна, за себе создаваат таков поглед за животот, при кој нивната положба им изгледа пристојна и оправдана. За поткрепување на таквите погледи, инстинктивно се дружат со овој круг на луѓе, што го признава нивниот статус и нивното сфаќање на животот.
- Трето, колку повнимателно го слушаме, ќе сфатиме дека во тоа, на прв поглед конфузно повторување на веќе слушнатото, има важни и корисни работи. Секој, кој со внимание се труди да ги слуша своите колеги, ќе ја разбере болката што живее во душата на секој алкохоличар. Што се однесува до мене, јас сакам да го слушнам тоа што е најдобро што човекот го има во себе, без оглед на тоа дали таквиот разговор се смета за премногу стручен, простачки или којзнае каков.
- Четврто, колку подобро ќе го запознаеме апстинентот, ќе можеме многу повеќе да му помогнеме. Конечно, ако новиот апстинент знае дека го почитуваме, ќе биде спремен со поголемо внимание да слуша и учи, повеќе и тој да ги почитува своите колеги. Иако слушањето на соговорникот е најважен облик на внимание, потребно е да се исполнат и други облици во односите, кои за подлога имаат вистинско заедништво, посебно кога во прашање се заболените алкохоличари. Еден од најважните облици е комуникацијата, што помеѓу себе ја имаат апстинентите. Времето поминато во разни активности во Клубот на лекувани алкохоличари, ни дава безброј прилики подобро да ги набљудуваме и взаемно да се запознаеме со новите апстиненти. Ако некој апстинент нешто крие во себе, за себе ја скратува можноста од каква било помош, а пријателот го оневозможува да биде од корист. Искуството покажува дека, колку почесто го посетува Клубот на лекувани алкохоличари, секој апстинент се повеќе станува свесен дека индивидуално неговите можности се ограничени, дека секој поединечно е слаб човек, кој може да егзистира само преку соработка во група со слични луѓе на себе, здружени во Клуб на лекувани алкохоличари.
%
